Kev Kaw Hluav Taws Xob Rau Pejxeem Txoj Kev Nyabxeeb yeej tsis yog tsim los ntawm ib yam teebmeem nkaus xwb; txhua zaug nws yeej muaj nws ib qho teebmeem txawv. PG&E yeej muab ntau ntau yam cov los xyuas ua ke thaum peb yuav txiav txim tias saib peb puas yuav muab hluav taws xob kaw. Cov uas peb yuav muab coj los xyuas ntawm no tej zaum yuav muaj, tiamsis tsis yog tag rau cov ntawm no xwb:

• Ib Qho Kev Ceebtoom Tsa Chij Liab (Red Flag Warning) uas Lub Chaw Saibxyuas Huabcua Hauv Lub Tebchaws (National Weather Service) tshaj tawm
• Qhov vaum ntawm huabcua yog nyob rau theem qis, ntau zaug nws yog 20% thiab qhuav dua
• Kev kwv yees tias yuav muaj cua ntsawj tsis tu hlob tshaj 25 mais rau ib teev (mph) thiab cov nthwv cua hlob ntsawj txog li 45 mph, nyob ntawm saib thaj chaw thiab cov huabcua rau thaj chaw ntawd xws li qhov sov, tooj roob hauv pes thiab dej nag huabcua (climate) yog zoo li cas
• Tej nroj ntsuag qhuav uas yuav kub nyiab thiab cov nroj tsuag uas tsis tau tuag (muaj dej lossis noo)
• Txhua yam uas lub chaw PG&E’s Wildfire Safety Operations Center thiab PG&E cov neeg ua haujlwm pom muaj tam sim

Tseemceeb tshaj, txawm tias peb yeej soj ntsuam thiab muab cov Kev Ceebtoom Tsa Chij Liab (Red Flag Warnings) tshaj tawm los ntawm lub chaw National Weather Service coj los xav los, qhov kev tshaj tawm ib qho Kev Ceebtoom Tsa Chij Liab yeej tsis txhais tias peb yuav tsum tau muaj ib qho Kev Kaw Hluav Taws Xob Rau Pejxeem Txoj Kev Nyabxeeb txhua zaug.

Vim li cas thiaj li muab hluav taws xob kaw mus rau ntawm ib lub zejzos uas tsis muaj cua hlob?

Cov kev kwv yees tias yuav muaj cua hlob yog ib yam ntawm txhua yam uas peb muab coj los xav thaum peb yuav txiav txiam los mus npaj ib qho Kev Kaw Hluav Taws Xob Rau Pejxeem Txoj Kev Nyabxeeb, nrog rau lwm yam zoo li cov kev kwv yees tias qhov vaum ntawm cov huabcua yuav nyob rau theem qis heev ntxiv rau kev muaj nroj tsuag qhuav thiab cov kev soj ntsuam pom nyob rau ntawm thaj chaw ntawd.

Txawm tias koj yeej tsis nyob rau ntawm ib thaj chaw ntxim yuav muaj hluav taws kub nyiab, lossis muaj cua hlob los, tej zaum koj cov hluav taws xob yeej tseem yuav raug kaw yog tias txoj xov xa hluav taws xob los rau koj lub zos yeej yog ib txoj uas cab txiav dhau ntawm ib thaj chaw uas muaj cua hlob ntsawj thiab muaj huabcua qhuav, ntxiv rau txoj kev ntxim yuav muaj hluav taws kub nyiab.

Peb npaj tias Kev Kaw Hluav Taws Xob Rau Pejxeem Txoj Kev Nyabxeeb yuav muaj ntau ntau zaug hauv ib xyoos nyob rau ntawm cov thaj chaw uas PG&E yog lub tuam txhab npaj hluav taws xob rau siv txawm tias peb yeej kwv yees tsis tau meej tias thaum twg, nyob qhov chaw twg thiab yuav muaj cua hlob thiab muaj huabcua qhuav pes tsawg zaug, ntxiv rau txoj kev ntxim yuav muaj hluav taws kub nyiab, thaum peb paub tias txhua yam yeej pauv sai heev li.

Cov neeg siv hluav taws xob uas nyob rau ntawm cov thaj chaw ntxim yuav muaj hluav taws kub nyiab yog cov uas lawv cov hluav taws xob ntxim yuav raug txiav, tiamsis tej zaum lwm cov neeg nyob rau lwm thaj chaw cov hluav taws xob los yeej yuav raug txiav ib yam nkaus, yog tias txoj xov xa hluav taws xob los rau lawv lub zos yeej yog ib txoj uas cab txiav dhau ntawm ib thaj chaw uas ntxim yuav muaj hluav taws kub nyiab. Peb xav kom peb cov neeg siv hluav taws xob npaj tau rau txoj kev kaw hluav taws xob txawm tias lawv yuav nyob lossis ua haujlwm nyob rau ib thaj chaw twg los xij.